Шығармашылық ұжым Рахат Ғазизұлын құрметпен шығарып салды.
Бүгін ҚР «Салтанат» мемлекеттік би ансамблінің ұжымы «Мәдениет саласының үздігі», күйші Рахат Ғазизұлын жаңа қызметке ауысуына байланысты құрмет-қошеметпан шығарып салды.
Рахат Сәрсенов 2023 жылдың 1 ақпанынан бастап Қазақстан Республикасының «Салтанат» мемлекеттік би ансамблінде директордың шығармашылық жөніндегі орынбасары болып тағайындалды. Бұл қызметте жоғары жауапкершілікпен еңбек етіп, ұжымның шығармашылық жолын дамытуға үлес қосты. 70 жылдық тарихы бар ансамбль сахнасында Нұрғиса Тілендиевтің әйгілі «Аққу» күйін қара домбырасымен орындап, өнерсүйер қауымның жүрегінен орын алды. 2025 жылдың тамыз айында жаңа қызметке ауысуына байланысты аталмыш лауазымнан абыроймен босатылды.
Сәрсенов Рахат Ғазизұлы өмірін ұлттық өнерді дамытуға арнаған кәсіби домбырашы, ұйымдастырушы, білікті маман.
Білім жолын 2000–2004 жылдары Дина Нұрпейісова атындағы Атырау музыка колледжінде бастап, домбыра мамандығы бойынша тәмамдады. Кейін 2004–2008 жылдары Құрманғазы атындағы Қазақ ұлттық консерваториясында кәсіби білімін жалғастырып, дәстүрлі музыка өнерінің терең қыр-сырын меңгерді. Швейцария, АҚШ, Ресей, Қытай, Франция, Германия, Австрия, Болгария, Түркия, Испания, Чехия, Словения, Венгрия және Корея елдеріне барып, ұлттық мәдениетімізді халықаралық деңгейде насихаттап, ел абыройын асқақтатты.
Марапаттары мен жетістіктері:
2004 ж. — Құрманғазы атындағы республикалық халық аспаптар байқауының лауреаты;
2006 ж. — Халықаралық «Шабыт» шығармашыл жастар фестивалінің лауреаты;
2021 ж. — «Мәдениет саласының үздігі» төсбелгісімен марапатталды;
2023 ж. — Түріксой ұйымының 30 жылдығына арналған мерейтойлық медаль иегері.
Құрметті Рахат Ғазизұлы! ҚР «Салтанат» мемлекеттік би ансамблінің ұжымының атынан алдағы жұмысыңызға сәттілік пен табыс тілейміз! Сіздің ұлттық өнерге сіңірген еңбегіңіз, шығармашылық жолыңыз бен кәсіби біліктілігіңіз — көпке үлгі. Қазақтың қасиетті домбырасын әлем елдерінде танытып, мәдениетіміздің өркендеуіне қосқан үлесіңіз зор. Әрбір бастамаңыз сәтті болып, мерейіңіз үстем болсын!
Алдағы жаңа белесіңізде де жарқын жетістіктер мен биік табыстар серігіңіз болсын! Деніңізге саулық, отбасыңызға амандық, шығармашылық шабытыңызға сарқылмас қуат тілейміз.
https://www.instagram.com/p/DNfOS38omty/
