ЖЫЛДЫҚ ҚОРЫТЫНДЫ
Тамырлы тарихы жетпіс жылға жуық ҚР “Салтанат” мемлекеттік би ансамблі үшін үстіміздегі жыл жаңа би қойылымдарына, түрлі премьераларға, гастрольдік сапарларға, жарқын жеңістер мен зор жетістіктерге, жағымды жаңалықтарға толы елеулі сәттерімен есте қалды.
ҚР Мәдениет және ақпарат министрлігінің қолдауымен, ансамбль директоры Е.Кенжалиев пен көркемдік жетекшіміз Қ.Төлегеннің бастамасымен 19-24 сәуір аралығында Қызылорда облысында ҚР «Салтанат» мемлекеттік би ансамблінің гастрольдік сапары ұйымдастырылды.
19 сәуір Байқоңыр қаласы, Мәдениет үйінде
20 сәуір Қазалы ауданы, Мәдениет орталығында
22 сәуір Шиелі ауданы, Мәдениет үйінде
23 сәуір Тереңөзек кенті, Сырдария атындағы аудандық мәдениет үйінде
24 сәуір Қызылорда қаласы, Н.Бекежанов атындағы Қызылорда облыстық қазақ академиялық музыкалық драма театрында концертіміз жоғары деңгейде өтті.
Одан бөлек, ансамбльдің бас балетмейстері, ҚР «Мәдениет саласының үздігі» Ақмарал Абдикаримовна, балетмейстер, Халықаралық конкурстардың лауреаты Талғат Рашидұлы, ансамбльдің көркемдік жетекшісі, Қазақстан Республикасы Тұңғыш Президентінің Қоры стипендиясының иегері Қуанышбек Төлеген Қызылорда қаласында практика мен теориядан шеберлік сағатын өткізіп, тәжірибелерімен бөлісті.
ҚР «Салтанат» мемлекеттік би ансамбль ұжымына облыс және аудан әкімдігінің атынан арнайы “Алғыс хат” табысталды.
ҚР «Салтанат» мемлекеттік би ансамблі Астана қаласында ұйымдастырылған 5-ші Дүниежүзілік көшпенділер ойындарына атсалысты. Бүкіл әлем көз тіккен жарыс 2024 жылы 8-14 қыркүйек аралығында елордада өтті. Ашылу және жабылу шарасына балет артистеріміз 1 айға жуық уақыт қызу дайындалып, кәсіби деңгейде өнер көрсетті.
23 қыркүйек күні Ресей елінің мәдени астанасы Санкт-Петербург қаласында “Балтийский дом” театр-фестивалінің сахнасында түрлі ұлт арасындағы достық, бірлік пен татулықты насихаттайтын концертіміз жоғары деңгейде өтті. Бұл ерекше кеште алпысқа жуық өнер шеберлері мен балет артистері қатысты. Ресей елі ыстық ықыласпен қарсы алды.
ҚР “Салтанат” мемлекеттік би ансамблінің балет артисі Лаура Уркенбаева «Ерен еңбегі үшін» медалімен марапатталды. Құралай Үкібаева мен Юрий Львович Қазақстан Республикасының Мәдениет және Ақпарат министрлігінің «Мәдениет саласының үздігі» төсбелгісін алса, балет артисіміз Азамат Асқаров «Құрмет» орденін иеленді.
27 қазан күні Елордамыз Астананың төрінде Республика күніне арналған «Күн дидарлы Қазақстан» атты концертіміз өтті. Қалибек Қуанышбаев атындағы Қазақ ұлттық музыкалық драма театрында ұйымдастырылған кештің шымылдығы премьера «Самғау» қойылымымен ашылды. Көрермендер репертуарға жаңадан енген билерді, қазақтың ұлттық және әлем халықтарының би қойылымдарын, соның ішінде Азия халықтарының билерін тамашалады.
5 қараша күні 69-шы жаңа маусымының ашылуы Алматы Theatre сахнасында өтті. Бұл кештің жаңа бағдарламасы «Азия аңыздары» деп аталды.
Концертте ҚР Халық әртісі Роза Рымбаева, қазақ эстрадасының жарық жұлдыздары Мирас пен Құралай, Ғани мен Бота, танымал тұлғалар мен зиялы қауым өкілдері, би саласының ардагерлері жиналды. Роза Рымбаева концертке жоғары бағасын беріп, ұжымға шығармашылық табыс тіледі.
Душанбе (Тәжікстан) қаласында өткен «Би бізді біріктіреді» атты халықаралық би фестивалінде өнер көрсеттік. Аталған шарада елдердің ең үздік би ұжымдары қатысты. Фестивальге келген ұжымның басшылары Тәжікстан Республикасының Мәдениет министрі М.А.Сатториенмен кездесті. Ансамбль басшысы Е.Кенжалиевке диплом табысталды.
Айта кетейік, талай дарын осы ансамбльдің аяғынан тік тұрып, қалыптасуына еңбек сіңірді. Жас буын өкілдері қазіргі таңда өнер майталмандары көрсеткен сара жолды әрі қарай жалғап, қазақ өнерінің көкжиегін кеңейтуге атсалысып жүр. Балет артистерінің өнер жолындағы еңбегі еленіп, көрерменнің көзайымына айналды. Халықтың ыстық ықыласына бөленген «Салтанат» мемлекеттік би ансамблінің би шашуы мұнымен таусылмайды, елге тартуы әлі алда.
https://www.instagram.com/p/DEPSzD_I5jR/?locale=ru
